Azərbaycan, Bakı, 23 may /Trend, müxbir N.İsmayılova/
Azərbaycan Mikromaliyyə Assosiasiyasının (AMFA) üzvlərinin tərkibində dəyişiklik baş verib. Bu barədə bazar ertəsi AMFA-dan məlumat verilib.
"Gafgaz Leasing" lizinq şirkəti assosiasiyanın yeni üzvü olub. Bununla yanaşı, yaxın vaxtlarda daha bir lizinq şirkətinin assosiasiyaya üzv olacağı gözlənilir", - assosiasiyadan deyilib.
İlin əvvəlindən AMFA-dan iki bank - "Azər Kredit Bank" və "Royal Bank", eləcə də mikromaliyyə təşkilatı "Normicro" çıxıb. Hazırda assosiasiyanın üzvlərinin sayı 26-dır.
2010-cu ilin sonuna olan məlumata görə, AMFA üzvlərinin aktivlərinin ümumi həcmi 3,68 milyard dollar təşkil edib. Təşkilatın kredit portfelinin ümumi həcmi ötən ilin sonlarına 2,13 milyard dollar təşkil edib. Aktiv müştərilərin sayı 465 982 nəfərdir.