Azərbaycan, Bakı, 21 iyun /Trend, müxbir A.Axundov/
Azərbaycanın Kənd Təsərrüfatı Nazirliyi yanında Fitosanitar Nəzarət Xidməti bütün ölkəni toksikoloji nəzarət və bitkilərin karantin ekspertizası laboratoriyalarının şəbəkəsi ilə əhatə etməyi planlaşdırır.
"2012-ci ildə Yevlaxda 1 toksikoloji nəzarət laboratoriyası, Şirvanda 1 bitkilərin karantin ekspertizası laboratoriyası açılacaq. Bundan sonra səkkiz rayonun hər birində 1 toksikoloji nəzarət və 1 bitkilərin karantin ekspertizası laboratoriyası açılacaq", - xidmətin rəhbəri Məmmədəli Dünyamalıyev çərşənbə axşamı Trend-ə bildirib.
Bu gün ölkədə yalnız iki - Bakıda 1 toksikoloji nəzarət laboratoriyası və 1 bitkilərin karantin ekspertizası laboratoriyası fəaliyyət göstərir. Onların hər birinin iki mobil avtolaboratoriyaları var.
Dünyamalıyevin sözlərinə görə, laboratoriyalarının sayının artırılması fermer və sahibkarlar üçün əlverişli olacaq.
"Biz regionlarda bitkilərdən nümunələr götürəcəyik və elə oradaca onları araşdıracağıq. Nümunələri Bakıya gətirmək üçün əlavə vaxt və vəsait lazımdır. Biz bunu sahibkarların işini asanlaşdırmaq üçün edirik", - Dünyamalıyev bildirib.
Onun sözlərinə görə, gələcəkdə bitkilərin yoxlanılması üçün daha 4 mobil avtolaboratoriyanın bilavasitə əkin sahələrinə gətirilməsi planlaşdırılır.
"Bütün bu işlər dövlət büdcəsindən Azərbaycan regionlarının sosia-iqtisadi inkişafı üzrə Dövlət Proqtramı çərçivəsində ayrılan vəsait hesabına həyata keçirilir. Gələcəkdə laboratoriyaların tikintisində və modernləşdirilməsində donor təşkilatların dəstək göstərəcəyi istisna edilmir", - Dünyamalıyev əlavə edib.