Azərbaycan, Bakı, 30 iyun /Trend, müxbir A.Axundov/
1995-ci ildən başlayaraq ölkə əhalisi tərəfindən qeyri-ərzaq mallarının alınmasına meyil ilbəil artıb. Trend-in məlumatına görə, bu barədə Dövlət Statistika Komitəsinin sədri Arif Vəliyev "Müstəqil Azərbaycanın inkişafı rəqəmlərdə" mövzusunda elmi simpoziumda çıxışı zamanı deyib.
"1995-ci ildə əhalinin ticarət şəbəkələrindən aldığı istehlak mallarının yalnız 25,0 faizi qeyri-ərzaq malları olduğu halda, 2010-cu ildə bu göstərici 40 faizə yaxın olub", - Vəliyev deyib.
Onun sözlərinə görə, 2010-cu ildə ticarət şəbəkəsindən daha çox geyim, ayaqqabı, elektrik malları, hesablama texnikası və teleradio malları, tikinti materialları, avtomobil və digər qeyri-ərzaq malları alınıb.
"Bütün bunlar ölkə əhalisinin yaşayış tərzinin ilbəil yaxşılaşmasının əyani sübutudur", - Vəliyev qeyd edib.
Onun sözlərinə görə, 2010-cu ildə əhaliyə 13,7 milyard manatlıq istehlak malları satılıb, onun real həcmi 1993-cü ilə nisbətən 4,8 dəfə artıb.
"1993-cü illə müqayisədə 2010-cu ildə ərzaq mallarının satışı 3,8 dəfə, qeyri-ərzaq mallarının satışı isə 7,6 dəfə artıb", - Vəliyev bildirib.