Azərbaycan, Bakı, 6 iyul /Trend, müxbir A.Axundov/
Azərbaycan 2011-ci ildə qeyri-neft ÜDM-də 8-10 faizlik artım gözləyir. Bu barədə Trend-ə çərşənbə axşamı iqtisadi inkişaf naziri Şahin Mustafayev məlumat verib.
"Bu il biz ÜDM-də qeyri-neft sektorunda əsasən əlavə dəyərin həcminin artırılması hesabına 8-10 faizlik artım gözləyirik", - Mustafayev bildirib.
Onun sözlərinə görə, bu çoxalma kənd təsərrüfatı, nəqliyyat, informasiya-kommunikasiya texnologiyaları sahəsindəki artım hesabına gözlənilir.
"Eləcə də ölkə iqtisadiyyatına investisiyalarda ciddi artım gözlənilir", - Mustafayev deyib.
Ölkənin 2012-ci ildə makroiqtisadi göstəricilər proqnozunun hazırlanması prosesi gedir.
"İş gedir, hesablamalar hələ başa çatmayıb", - Mustafayev bildirib.
Proqnozlara görə, 2014-cü ilədək neft sektorunun Azərbaycan ÜDM-də xüsusi çəkisi 2009-cu ildəki 47 faizə nisbətdə 38 faiz azalacaq. Bu, iqtisadiyyatın uğurlu şaxələndirilməsi nəticəsində təmin olunacaq.
Bu halda qeyri-neft sektorunun ÜDM-də payı 45 faizdən 53 faizədək artacaq.
"Bu artımın təmini üçün Azərbaycan Prezidentinin tapşırığı ilə özəl sektorun inkişafı məqsədilə qanunvericilik bazasının və dövlət tənzimləmə sisteminin təkmilləşdirilməsi, ölkədə biznes mühitinin daha da yaxşılaşdırılması, kiçik və orta sahibkarlığa dövlət dəstəyi üzrə tədbirlərin genişləndirilməsi, maliyyə, infrastruktur, konsultativ, informasiya təminatının yaxşılaşdırılması, xarici və yerli investisiyaların, müasir texnologiyaların və idrəetmə təcrübəsinin cəlb edilməsi, eləcə də yüksəkkeyfiyyətli və rəqabətqabiliyyətli məhsulun istehsalının dəstəklənməsi nəzərdə tutulur", - bundan əvvəl iqtisadi inkişaf naziri Şahin Mustafayev deyib.
Qeyri-neft sektorunun inkişafı üzrə ölkə regionlarının sosial-iqtisadi inkişafı üzrə dövlət proqramı çərçivəsində tədbirlərin həyata keçirilməsi nəzərdə tutulub. Bundan başqa, istehsal və xidmətlər sahəsində müəssisələrin tikilməsi mühüm yer tutur.
Ötən il Azərbaycan regionlarında 160-dan çox sənaye, kənd təsərrüfatı, ticarət, eləcə də xidmət sahəsində müəssisə istismara verilib.
2010-cu ildə 200-dən artıq müəssisənin, eləcə də kənd təsərrüfatı məhsullarının emalı üzrə 12 sənaye meydanının tikintisi davam etdirilib.
Ötən il Lənkəranda konserv zavodu və çay fabriki, Naxçıvanda avtomobil zavodu, tikinti materiallarının istehsalı üzrə bir neçə müəssisə, Sumqayıtda texnopark, Masazırda duz istehsalı zavodu, Biləsuvarda konserv zavodu, Gədəbəydə qızıl istehsalı zavodu, eləcə də ölkə regionlarında heyvandarlıq və süd istehsalı kompleksləri istismara verilib.
