...

İran sanksiyalarda adı çəkilən şəxsi neft naziri seçməklə BMT qətnamələrinə etinasızlığını göstərir - Aİ-nin müşaviri

Biznes və iqtisadiyyat xəbərləri Materials 28 İyul 2011 15:17 (UTC +04:00)

Azərbaycan, Bakı, 28 iyul /Trend, müxbir T.Cəfərov/

İran Prezidenti Mahmud Əhmədinejadın adı beynəlxalq sanksiyalarda çəkilən "Sepah" generalı Rüstəm Qasımini neft naziri postuna namizəd kimi təqdim etməsi İslam Respublikasının bir növ beynəlxaq ictimaiyyətə "ağız büzməsi" və etinasızlığını göstərir. Bunu Avropa İttifaqının iqtisadi məsələlər üzrə müşaviri Mehrdad Emadi Londondan telefonla Trend-ə bildirib.

Emadi qeyd edib ki, Rüstəm Qasımi neft naziri vəzifəsinə təyin olunarsa, o, müxtəlif ölkələrdə İranı təmsil etməlidir. "Qasıminin digər ölkələrə səfər etməsi özü risklidir. Ona görə ki, sanksiya tətbiq etmiş ölkələr həmin şəxsin həbsini tələb edəcəklər. Bu şərtlər altında belə şəxsin neft naziri postuna təqdim olunması İranın BMT TŞ-yə, Avropa və ABŞ-a "ağız büzməsi" və etinasızlığıdır", - Aİ müşaviri deyib.

İran prezidenti Mahmud Əhmədinejad 4 nazir postuna yeni namizədlər irəli sürüb. Əhmədinejad bu şəxslərin namizədliklərinin parlamentdə müzakirəsi üçün iyulun 27-də spiker Əli Laricaniyə təqdimat göndərib. Təqdimatda Əbdülrza Şeyxülislaminin kooperasiya, əmək və ictimai təminat naziri, Mehdi Qəzənfərinin sənaye, mədən və ticarət naziri, Rüstəm Qasıminin neft, Məhəmməd Abbasinin isə idman və gənclər naziri postuna namizədliyi irəli sürülüb.

Parlament təqdimata bir həftə sonra baxacaq. Sözügedən nazir postlarının hamısı hazırda boşdur.

İranın İslam İnqilabı Keşikçiləri Korpusunun (Sepah) komandirlərindən olan Rüstəm Qasımi Xatəmul-Ənbiya Qərargahının rəhbəridir. İran saytlarının məlumatına görə, Qasimi 20 ilə yaxın neft sənayesində fəaliyyət göstərib. O, İranın Cənub-Pars qaz layihəsinin 6 fazasının icraçısı olub. Qasıminin adı BMT Təhlükəsizlik Şurasının 1929 saylı qətnaməsində, Avropa və Amerikanın sanksiyalarında çəkilir.

Emadi deyib ki, Qasıminin neft naziri olması İranın OPEK-dəki zəifləmiş mövqeyini daha da zəiflədəcək.

"İran hazırda OPEK-in sədridir. Qasimi neft naziri olsa, OPEK-in iclaslarında işitirak etsə belə, ona etibar olunacaqmı? Qasıminin İranın OPEK-dəki itirilmiş mövqeyi və mənafeyini qoruya biləcəyi şübhə altındadır", - iqtisadi müşavir bildirib.

İran 2011-ci ilin yanvarından OPEK-ə rəhbərlik edir. Bu müddət ərzində ölkənin neft naziri vəzifəsinə bir neçə təyinat olub. İslam Respublikasının sabiq neft naziri Məsud Mirkazımi neft ixrac edən ölkələrin təşkilatına sədr seçilsə də, sonradan o, istefaya göndərildi. Bundan sonra OPEK-də İranı Neft Nazirliyinə müvəqqəti rəhbər seçilmiş Məhəmməd Əliabadi təmsil etdi. Qasımi neft naziri seçilərsə, OPEK-ə sədrlik də ona keçəcək.

İran 36 il ərzində ilk dəfədir ki, OPEK-ə sədrlik edir.

Emadinin fikrincə, beynəlxalq səviyyədə təhlükəli şəxs kimi tanınan Qasımiyə OPEK ölkələri etimad göstərməyəcək və ona inanmayacaqlar.

O əlavə edib ki, Əhmədinejad bu addımı "Sepah"la əlaqələrini möhkəmləndirmək məqsədi ilə atmış olsa belə, Qasıminin neft naziri postuna təyinatı İranın "xəstə" neft-qaz sənayesində təsəvvür edilməyəcək ziyanlara səbəb olacaq.

"Təssüf ki, İran ölkənin mənafeyi uğrunda deyil, bəzi cinahların məqsədlərinə müvafiq idarə edilir", - Emadi bildirib.

Xəbər lenti

Xəbər lenti