Azərbaycan, Bakı, 9 avqust /Trend, müxbir N.İsmayılova/
İlin birinci yarısında Azərbaycan Mərkəzi Bankı (AMB) 324 milyon dollar həcmində valyutanın sterilizasiyasını aparıb, valyuta bazarı isə özünütənzimləyən rejimdə fəaliyyət göstərib. Trend-in məlumatına görə, bu barədə Mərkəzi Bankın pul siyasəti üzrə açıqladığı hesabatda deyilir.
İlin əvvəlindən AMB valyuta bazarında təklif kanallarının genişləndirilməsi və yeni əməliyyat mexanizmi şəraitində özünün məzənnə siyasətini həyata keçirib.
İlin birinci yarısında manatın dollara nisbətdə məzənnəsi 1,4 faiz möhkəmlənib. Bu il ərzində milli valyutanın sabitliyi makroiqtisadi və maliyyə sektorunun sabitliyinə müsbət təsir göstərib.
İlin birinci yarısında manatın nominal effektiv məzənnəsi Azərbaycanın bəzi tərəfdaş ölkələrinin valyutalarına nisbətdə möhkəmlənib və digər ölkələrin valyutalarına nisbətdə ucuzlaşıb. Manatın nominal effektiv məzənnəsinin dinamikası real effektiv məzənnənin də dəyişməsinə təsir göstərib.
Hesabat dövrü ərzində manat bəzi ölkələrin valyutalarına nisbətdə (Avropa, Böyük Britaniya, Rusiya, Gürcüstan, Yaponiya, İsrail, Çin, Cənubi Koreya) həm nominal, həm də real olaraq ucuzlaşıb. ABŞ, Türkiyə və Belarusun valyutalarına nisbətdə manat nominal ucuzlaşıb, real şəkildə isə möhkəmlənib.
İlin birinci yarısında qeyri-neft sektoru üzrə nominal effektiv məzənnə ümümi mal dövriyyəsində 1,7 faiz ucuzlaşıb. Tərəfdaş ölkələrdə inflyasiya nominal effektiv məzənnənin 1,6 faiz azalmasına kömək edib. Qeyri-neft sektoru üzrə nominal effektiv məzənnə 0,8 faiz ucuzlaşıb. Hesabat dövrü ərzində real effektiv məzənnə 3,1 faiz ucuzlaşıb. Bura neft ixracının 80 faizdən çoxu yönəldilir.
