Azərbaycan, Bakı, 20 sentyabr /Trend, müxbir N.İsmayılova/
2011-ci ilin birinci yarısında birbaşa dövlət və dövlət tərəfindən zəmanət verilmiş kreditlərin, özəl sektora cəlb olunmuş kredit və borcalrın, depozit və digər kapital qoyuluşlarının xüsusi çəkisi Azərbaycanın xarici investisiyalarının ümumi həcminin 50 faizini təşkil edib. Trend-in məlumatına görə, bu barədə Azərbaycan Mərkəzi Bankının ödəniş balansında deyilir.
Kapital qoyuluşlarının ümumi həcmi 2001,4 milyon dollar olub ki, bu da 2010-cu ilin müvafiq dövr göstəricisindən 13,3 faiz azdır.
Kreditlərin 34,3 faizi (607,3 milyon dollar) birbaşa dövlət tərəfindən və dövlət zəmanəti ilə cəlb olunub. Zəmanət verilməyən kreditlərin payına 1165,3 milyon dollar (65,7 faiz) düşüb.
Zəmanət verilməyən kreditlərin 476,4 milyon dolları banklar, 402,6 milyon dolları neft-qaz sektoru, 286,3 milyon dolları digər müəssisə və şirkətlər tərəfindən cəlb olunub.
Bundan əvvəl cəlb olunmuş kreditlərin ümumi həcmindən 1182,1 milyon dollar qaytarılıb. Qaytarılan kreditlərin 50 faizi (590,8 milyon dollar) bank sistemi, 10,5 faizi (124,1 milyon dollar) dövlət və dövlət zəmanətli, 24,4 faiz (288 milyon dollar) neft-qaz sektoru, 15,1 faiz (179,2 milyon dollar) isə digər müəssisə və şirkətlərin payına düşüb.
