Azərbaycan, Bakı, 23 sentyabr /Trend, müxbir A.Axundov/
Azərbaycan və Avropa İttifaqı arasında assosiativ saziş üzrə aparılan danışıqlarda tərəflərin mövqeləri bir sıra məsələlərdə bir-birindən fərqlənir, lakin Azərbaycan Xarici İşlər Nazirliyi ümid edir ki, bu ziddiyyətlər aradan qaldırılacaq. Trend-in məlumatına görə, bunu cümə günü jurnalistlərə nazir müavini Mahmud Məmmədquliyev deyib.
"Bu gün danışıqlar videokonfranslar vasitəsilə davam etdirilir, sonuncusu srağagün keçirilib. Oktyabrda Bakıda Azərbaycan hökuməti və Avropa Komissiyası arasında assosiativ saziş haqqında növbəti görüşün keçirilməsi planlaşdırılır", - o bildirib.
Danışıqlar ötən ilin iyul ayında başlanıb.
Onun sözlərinə görə, bu sazişi imzalamış Ukrayna, Moldova kimi ölkələr danışıqlara Azərbaycandan çox əvvəl başlayıb.
"Burada heç də hər şey Azərbaycandan asılı deyil, ona görə də biz danışıqların nə zaman başa çatacağını deyə bilmərik", - xarici işlər nazirinin müavini deyib.
Aİ Cənubi Qafqazın hər bir ölkəsi ilə ayrı-ayrılıqda saziş imzalamaq istəyir. Onların hər birinin məzmunu Aİ ilə əməkdaşlığın dərinliyindən asılı olacaq. Bununla yanaşı, 2011-ci ilin sonunadək danışıqların başlanması gözlənilən Aİ ölkələri ilə viza rejiminin asanlaşdırılması haqqında ayrıca bir sazişin də imzalanması nəzərdə tutulur.
Assosiativ sazişə dörd istiqamət - siyasi dialoq, o cümlədən təhlükəsizlik, ədliyyə və insan hüquqlarının qorunması, iqtisadi, sosial-humanitar və ticarət məsələləri daxildir.
Sonuncu istiqamət gələcəkdə Azərbaycan məhsullarının Aİ-yə ixracı üçün imkan yaradacaq. Azərbaycan artıq Avropa İttifaqı ölkələrinə altı min növdən çox məhsulun rüsumsuz ixracı üzrə güzəştlərdən istifadə edir, lakin təəssüf ki, bu məsələdə malların keyfiyyəti əsas problem olaraq qalır.
Cənubi Qafqaz ölkələrində münaqişələrin həlli və bu ölkələr üçün daxili islahatların aparılmasına təsirli stimul olan və Aİ-yə gələcək assosiativ üzvlüyün perspektivləri barədə qərar 2009-cu il sentyabrın 30-da Brüsseldə Cənubi Qafqaz ölkələri ilə əməkdaşlıq haqqında Aİ Şurasının illik sessiyası zamanı qəbul edilib.
