Azərbaycan, Bakı, 28 sentyabr /Trend, müxbir N.İsmayılova/
Əsasında 2012-ci il dövlət büdcəsi və icmal büdcənin proqnozlarının hazırlandığı və Azərbaycan hökuməti tərəfindən bir bareli 80 dollar səviyyəsində qoyulmuş neftin qiyməti üzrə proqnoz mühafizəkar deyil. Bu barədə Trend-ə çərşənbə günü Azərbaycanın maliyyə nazirinin müavini Azər Bayramov deyib.
"Biz dünya bazarında neftin qiymətinin kəskin azalmasının şahidi olmuşuq, ona görə də 80 dollarlıq proqnoz mühafizəkar deyil. Digər tərəfdən, bu məsələdə həmişə proqnozu ötmək yaxşıdır, nəinki vəsaiti bütöv almamaq", - Bayramov bildirib.
Nazirlik sentyabrın 14-də gələn il və sonrakı 3 il üçün büdcə paketini Nazirlər Kabinetinə təqdim edib.
Azərbaycanın 2012-ci il büdcəsinin gəlir hissəsi 16436,4 milyon manat, xərclər hissəsi 16984,4 milyon manat proqnozlaşdırılıb.
2011-ci il proqnozları ilə müqayisədə büdcə gəlirlərinin artımı 5,67 faiz, xərclər isə 6,5 faiz səviyyəsində gözlənilir.
Dövlət büdcəsinin defisiti 548 milyon dollar səviyyəsində proqnozlaşdırılır ki, bu da növbəti il üçün proqnozlaşdırılan ÜDM-in 1,3 faizini təşkil edir.
2012-ci ilin əsas makroiqtisadi göstəricilərinə dair proqnozlara əsasən, gələn il ÜDM-in real artımı 5,7 faiz, qeyri-neft ÜDM-i 8,6 faiz, inflyasiya səviyyəsi 6 faiz, neftin dünya bazarlarındakı qiyməti 80 dollar/barel səviyyəsində proqnozlaşdırılıb.
Ölkənin ÜDM-i 43,5 milyard manat həcmində proqnozlaşdırılıb.
Sentyabrın 28-nə olan rəsmi məzənnə 0,7869 AZN/USD təşkil edir.
