Azərbaycan, Bakı, 3 noyabr /Trend, müxbir A.Axundov/
Azərbaycan əhalisinin mebelə olan tələbatının 60-70 faizi yerli istehsal hesabına ödənilir. Trend-in məlumatına görə, bu barədə cümə axşamı jurnalistlərə Azərbaycanda iri mebel istehsalçısı olan "Embawood" şirkətinin marketinq üzrə direktoru İlkin Manafov deyib.
"Azərbaycanda minlərlə mebel istehsalçısı var. Bazarın 10-12 faizi "Embawood"un payına düşür, satış həcmi üzrə şirkət yaxın rəqibini 10-12 dəfə qabaqlayır", - Manafov bildirib.
Onun sözlərinə görə, Azərbaycanda mebel bazarının inkişafının həlledici faktorlarından biri gəlinə cehiz vermək adətidir ki, burada əsas element mebeldir.
"Əgər MDB ölkələrində mebel xərcləri ildə adambaşına 22-23 dollar təşkil edirsə, Azərbaycanda bu rəqəm yarım dəfə çoxdur. Lakin, məsələn, Almaniyada bu göstərici ildə təxminən 250 avro təşkil edir ki, bu da Azərbaycandan 8 dəfə çoxdur", - Manafov əlavə edib.
Onun sözlərinə görə, əgər Azərbaycanda mebel 15-16 ildə bir dəfə yenilənirsə, Avropada bu, 2-3 ildə bir dəfə baş verir.
Şirkətin araşdırmalar və təkmilləşdirmə şöbəsinin rəhbəri Zöhrab Mehdixanovun sözlərinə görə, illər ötdükcə Azərbaycan istehlakçılarının mühafizəkarlığı azalır.
"Azərbaycanlı istehlakçılar çox mühafizəkardırlar, lakin son illər bu xüsusiyyət yavaş-yavaş zəifləməyə başlayır. Son illər Azərbaycanda modern üslubda mebellərə tələbat artır ki, bu tendensiya gələcəkdə də davam edəcək. Bununla yanaşı, klassik üslub həmişə bazarda olacaq", - Mehdixanov deyib.
O bildirib ki, ötən ildən Azərbaycanda kappuçino, qoz rəngləri dəbdə olub, lakin ağ rəng üstünlük təşkil edib.
"Son üç ildə dünyada ən çox tələb olunan mebel rəngi ağdır. Bu rəng Azərbaycanda son illər məşhur olub. Gələcəkdə bu tendensiya davam edəcək", - Mehdixanov qeyd edib.
Azərbaycan Dövlət Statistika Komitəsinin məlumatına görə, yanvar-sentyabrda ölkədə 28,3 milyon manat dəyərində mebel istehsal edilib ki, bu da ötən ilin analoji dövrü ilə müqayisədə 4,3 faiz azdır. Bu dövrdə mebel istehsalına 4,3 milyon manat (ÜDM-in 0,1 faizi) dəyərində investisiya qoyulub.
Noyabrın 3-nə olan rəsmi məzənnə 0,7868 AZN/USD təşkil edir.
