Azərbaycan, Bakı, 10 noyabr /Trend, müxbir A.Axundov/
Azərbaycanın mənzil bazarında əməliyyatların təqribən dörddə biri ipotekanın payına düşür. Bu barədə cümə axşamı Trend-ə "MBA Group" konsaltinq şirkətinin baş direktoru Nüsrət İbrahimov deyib.
"Əgər bu gün Azərbaycanda ay ərzində orta olaraq 750-780 mənzil satılırsa, onlardan 220-230-u ipoteka kreditinin hesabına əldə edilir. Fərdi evlərin alınması üzrə əməliyyatlarda ipotekanın payı aşağıdır", - İbrahimov bildirib.
Onun sözlərinə görə, hazırda ipoteka kreditləşməsi daşınmaz əmlak bazarının fəallığına kömək edən əsas amillərdən biridir.
"Baxmayaraq ki, bu pulların böyük hissəsi təkrar mənzil bazarına gedir, ipoteka bilavasitə tikinti bazarının inkişafına təsir edir. Öz mənzillərini sataraq başqa mənzillərə və ya evlərə daşınan insanlar təmir, yaxud tikintiyə müəyyən vəsait xərcləyirlər", - İbrahimov deyib.
Bununla yanaşı, onun sözlərinə görə, ipotekanın ayrılma məbləğı aşağı olaraq qalır.
"Bu məbləğ bazarın tələblərinə cavab vermir, onu yüksəltmək lazımdır", - o deyib.
Hazırda Azərbaycan İpoteka Fondunun (AİF) şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Güzəştli kreditlər üçün ilkin ödəniş 15 faiz, adi kreditlər üçün isə 20 faiz təşkil edir.
Azərbaycan İpoteka Fondu 2005-ci ilin sentyabrında Azərbaycan Prezidentinin fərmanı ilə dövlət təşkilatı qismində yaradılıb. Onun nizamnaməsi Prezidentin ayrıca fərmanı ilə 2005-ci ilin dekabrında təsdiq edilib. AİF-in əsas məqsədi Azərbaycan vətəndaşlarının uzunmüddətli maliyyələşdirmə vasitəsilə mənzillərlə təmin edilməsi üçün maliyyələşmə mexanizmlərinin yaradılmasından, eləcə də ipoteka kreditləşməsinə daxili və xarici investisiyaların cəlb edilməsindən ibarətdir.
Noyabrın 10-na olan rəsmi məzənnə 0,7866 AZN/USD təşkil edir.
