Azərbaycan, Bakı, 11 yanvar /Trend, müxbir N.İsmayılova/
2012-ci il martın 31-dən aprelin 4-dək Xartumda (Sudan) İslam İnkişaf Bankının (İİB) Müdirlər Qrupu Şurasının 37-ci illik iclası keçiriləcək. Trend-in məlumatına görə, bu barədə bankın cümə axşamı yaydığı məlumatda deyilir.
Xartumda bu iclasla paralel olaraq İxrac kreditləri və investisiyalarının sığortası üzrə İslam Korporasiyasının Müdirlər Şurasının (ICIEC) 19-cu, Özəl sektorun inkişafı üzrə İslam Korporasiyasının Baş Assambleyasının (ICD), Beynəlxalq İslam Ticarət-Maliyyə Korporasiyasının VII Baş Assambleyasının (ITFC), İnkişaf məqsədilə Həmrəylik İslam Fondunun Müdirlər Şurasının (ISFD) V illik iclasları da keçiriləcək.
Azərbaycan 1992-ci ildən İİB-in üzvüdür və hazırda bankın ölkə üzrə portfeli 700 milyon dollara çatır ki, bu vəsait iqtisadiyyatın müxtəlif sahələrində layihələrin həyata keçirilməsinə ayrılıb. ICD və ITFC-nin Azərbaycandakı portfelinin ümumi həcmi 200 milyon dollara çatır.
Bankda Azərbaycan tərəfdən müdir iqtisadi inkişaf naziri Şahin Mustafayevdir.
