Azərbaycan, Bakı, 24 yanvar /Trend, müxbir A.Axundov/
"İcbari sığortalar haqqında" yeni qanunun tələblərinə uyğun olaraq yaradılan İcbari Sığorta Bürosunun iştirakçılarının sayı səkkizə çatıb. Trend-in məlumatına görə, bu barədə çərşənbə axşamı büronun saytında məlumat verilib.
Qanun icbari sığortanın dörd növünü - daşınmaz əmlakın, avtonəqliyyat vasitələri sahiblərinin məsuliyyət, sərnişinlərin və daşınmaz əmlakın istismarı zamanı vətəndaş məsuliyyətinin sığortalanmasını tənzimləyir.
Yanvarın 23-də büronun reyestrinə bu gün üçün sonuncu olaraq "Alfa Sığorta" şirkəti daxil edilib. Şirkət sərnişinlərin icbari sığortasından başqa icbari sığortanın üç növü üzrə xidmətlər göstərəcək.
Büronun təsisçiləri 6 şirkətdir - "Paşa Sığorta", "Atəşgah Sığorta", "Ata Sığorta", AXA MBASK, "Xalq Sığorta" və "Standard Insurance". Daha sonra büroya "AzSığorta" üzv qəbul edilib.
Maliyyə Nazirliyi kollegiyasının qərarı ilə sığorta növləri üzrə fəaliyyətə icazə almaq üçün ödəniş həcmləri avtonəqliyyat vasitələri sahiblərinin məsuliyyətinin icbari sığortası üçün 200 min manat, sərnişinlərin sığortalanması üçün 200 min manat, daşınmaz əmlakın sığortalanması üçün 100 min manat və daşınmaz əmlakın istismarı zamanı vətəndaş məsuliyyətinin sığortalanması üçün 100 min manat səviyyəsində müəyyənləşdirilib.
"Alfa Sığorta" ASC-nin təsisçisi 2006-cı ilin dekabrında şirkətin 100 faizlik səhmlərini alan "Texnikabank" ASC-dir. "Alfa Sığorta"nın 6-sı icbari, 24-ü könüllü olmaqla, 30 növ sığorta xidməti göstərmək hüququ var.
Azərbaycanda 29 sığorta və bir təkrar sığorta şirkəti fəaliyyət göstərir. Bununla yanaşı, "Fidan Sığorta" şirkətinin fəaliyyəti müvəqqəti olaraq dayandırılıb.
Yanvarın 24-nə rəsmi məzənnə 0,7862 AZN/USD təşkil edir.
