Azərbaycan, Bakı, 6 aprel /Trend, müxbir Ə.Həsənov/
Son bir il ərzində Bakının daşınmaz əmlak bazarında ekspozisiya müddəti (daşınmaz əmlakın real qiymətə satışı dövrü) 18 faiz azalıb ki, bu da bazarda aktivliyin artmasının nəticəsidir. Bu barədə cümə günü Trend-ə "MBA LTD" konsaltinq şirkətinin baş direktoru Nüsrət İbrahimov bildirib.
"Hazırda yerli bazarda ekspozisiya müddəti 97 gün təşkil edir. Bu, regionun digər ölkələrinin paytaxtlarının göstəriciləri ilə müqayisədə yaxşı göstəricidir", - İbrahimov deyib.
Müşahidələr göstərir ki, əgər daşınmaz əmlak bazarında tənəzzül dövrü 3-5 il davam edirsə, o zaman 8-12 il ərzində sabitləşmə və artım prosesi baş verir.
"Əgər tənəzzül dövründə qiymətlər 25 faiz aşağı düşürsə, artım dövründə qiymətlər 50 faiz yüksəlir. Uzunmüddətli perspektivdə tarixən həmişə daşınmaz əmlaka tələbat olub və onun qiymətləri daim artıb", - İbrahimov vurğulayıb.
