Azərbaycan, Bakı, 10 aprel /Trend, müxbir Ə.Həsənov/
Azərbaycanın Auditorlar Palatası birinci rüb ərzində ölkə ərazisində auditor fəaliyyətinin göstərilməsinə 22 lisenziya verib. Bu barədə çərşənbə axşamı Trend-ə palata sədrinin müşaviri Nəcəf Talıbov bildirib.
"Onlardan 18 lisenziya artıq mövcud lisenziyaların fəaliyyət müddətinin başa çatması, bir lisenziya isə "Halal audit" firmasının adının "UPA International Azerbaijan"a dəyişməsi ilə əlaqədar verilib, qalanları isə yeni lisenziyalardır", - Talıbov vurğulayıb.
Onun sözlərinə görə, hazırda Azərbaycanda auditor fəaliyyəti göstərən firmaların sayı 50-yə çatır. Birinci rübdə lisenziyanın ləğv edilməsi halları olmayıb.
"İldə orta hesabla maksimum 1-2 lisenziya geri alınır", - müşavir qeyd edib.
Onun sözlərinə görə, may-iyun aylarında Auditorlar Palatası tərəfindən növbəti imtahanların keçirilməsi planlaşdırılıb və auditor fəaliyyəti göstərmək istəyənlər ərizlərini təqdim edə bilərlər. Hazırda lisenziya əldə etmək üçün artıq iki firma müraciət edib.
