Azərbaycan, Bakı, 18 may /Trend, müxbir A.Axundov/
Anglo Asian Mining plc şirkəti (Azərbaycanda qızıl istehsalçısı) Azərbaycan Beynəlxalq Bankından (ABB) Gədəbəydə qızılın yuyulması üzrə zavodun tikintisi üçün 7,5 milyon dollar məbləğində kreditin cəlb edilməsi barədə razılaşma əldə edib.
Bu barədə şirkətin cümə günü yaydığı məlumatda deyilir.
"Kreditin hesabına çən yuyulması üsulu üzrə zavodun tikintisinin ilkin mərhələsi maliyyələşdiriləcək", - məlumatda deyilir.
Sazişin şərtlərinə görə, rüblük əsasda qaytarılacaq kredit üzrə faiz dərəcəsi illik 12 faiz təşkil edir.
Kreditin ödənilməsinə hər bir tranşın alınmasından iki il sonra başlanacaq və 12 bərabər rüblük ödəmələr şəklində həyata keçiriləcək.
"Şirkət bu layihənin maliyyələşdirilməsi üçün əlavə vəsaitlərin cəlb edilməsi üzrə danışıqları davam etdirir", - məlumatda deyilir.
Gədəbəyin qızıl mədənlərində tikiləcək zavodun 2013-cü ildə istismara verilməsi planlaşdırılır.
