Azərbaycan, Bakı, 21 iyun /Trend/
Rusiya Federal Antiinhisar Xidmətinin sədri İqor Artemyev MDB iştirakçı dövlətlərinin Antiinhisar Siyasəti üzrə Dövlətlərarası Şurasına (ASDŞ) rəhbərlik edəcək.
Trend-in məlumatına görə, Artemyev Şuraya iki il müddətinə sədrlik edəcək. Bundan əvvəl bu vəzifəni Qazaxıstanın Rəqabətin Müdafiəsi Agentliyinin sədri Məcid Esambayev icra edirdi.
Şuranın yeni rəhbərinin seçilməsi cümə axşamı ASDŞ-nin Bakıda keçirilən iclasında baş tutub.
ASDŞ-nin növbəti iclası payızda Ukraynada keçiriləcək. Bu iclasda Azərbaycanın Şurada həmsədrliyi Ukraynaya keçəcək. Azərbaycan 2011-ci ilin oktyabrında Almatıda ASDŞ-nin həmsədri seçilib.
Bakıda keçirilən tədbirdə MDB ölkələrinin, o cümlədən Azərbaycan, Qazaxıstan, Ukrayna, Rusiya, Moldova, Belarus və Tacikistanın antiinhisar orqanları, MDB İcraiyyə Komitəsi, "MDB ölkələrində rəqabətin inkişafına yardım" qeyri-kommersiya tərəfdaşlığı təşkilatlarının 50-dən artıq nümayəndəsi iştirak edib.