Gürcüstan, Batumi, 26 iyul /Trend, müxbir N.Kirsxaliya/
Batumidə Azərbaycan investisiyaları hesabına daha bir beşulduzlu mehmanxana tikiləcək. "London" mehmanxanasının tikintisi rəsmən bu gün başlayıb.
Trend-in məlumatına görə, tikintinin təməlqoyma mərasimində Batuminin meri Robert Çxaidze, Acarıstanın maliyyə naziri Zaur Bolkvadze və Azərbaycanın Naxçıvan şəhərinin meri Vüqar Səfərov iştirak ediblər. Məhz Naxçıvan investisiyaları hesabına, bu yaxınlarda dağıdılan "London" mehmanxanasının yerində yenisi tikiləcək.
Qeyd edək ki, yeni mehmanxana keçmiş "London" mehmanxanasının ərazisində tikiləcək və onun fasadı saxlanılacaq. Mehmanxanada 60 otaq nömrəsi olacaq. Qərara alınıb ki, yeni binanın fasadı üçün köhnə mehmanxanadan qalan daşlardan istifadə olunsun.
İşləri "Gəmi Qaya" şirkəti aparır. İndiki mərhələdə bünövrənin hazırlanması prosesi gedir. Azərbaycan investorları tikintiyə 10 milyon dollar ayırıblar.