Azərbaycan, Bakı, 8 oktyabr /Trend, müxbir A.Axundov/
Azərbaycanda ipoteka kreditləri üzrə ilkin ödənişlərin zəmanət fondu yaradılacaq. Bu barədə bazar ertəsi Trend-ə Azərbaycan Mərkəzi Bankının (AMB) baş direktoru Rəşad Orucov bildirib.
"İpoteka kreditlərinin ilkin ödənişi üzrə zəmanət verən xüsusi fond yaradılacaq. Yəni ilkin ödənişi toplaya bilməyən gənc ailə xüsusi fonddan zəmanət alır və bununla ilkin ödəniş olmadan mənzil almaq imkanı əldə edir. Bu mexanizm hazırda müzakirə olunur", - Orucov deyib.
Onun sözlərinə görə, bu qurum Azərbaycan İpoteka Fondu (AİF) yanında yaradılacaq.
"Qurum AİF yanında yaradıla bilər, lakin onun institusional yerləşdirilməsinin müxtəlif variantları mövcuddur", - Orucov bidlirib.
Onun sözlərinə görə, fondun fəaliyyətinin maliyyələşdirilməsinə dövlət büdcəsindən vəsaitlər ayrıla bilər.
"Fondun müvafiq zəmanətinin sığortalanması üçün kifayət qədər resursa malik olmasından ötrü onun maliyyələşdirilməsi zamanı büdcə vəsaitlərindən istifadə oluna bilər", - o deyib.
Bununla yanaşı, Orucov fondun yaradılacağı tarixi göstərməkdə çətinlik çəkib.
"Ümid edirik ki, yaradılma prosesi tezliklə başa çatacaq", - o deyib.