Azərbaycan, Bakı, 8 oktyabr /Trend, müxbir A.Axundov/
Azərbaycan bankları öz kapitallarını kapitallaşma üzrə yeni tələblərə uyğunlaşdırmaq üçün kifayət qədər potensiala malikdirlər. Bu barədə bazar ertəsi Trend-ə Azərbaycan Mərkəzi Bankının (AMB) baş direktoru Rəşad Orucov deyib.
"Əlbəttə ki, biz bu qərar qəbul edilənədək ölkə banklarının yeni tələblərə hansı səviyyədə cavab verəcəkləri ilə bağlı vəziyyəti ətraflı təhlil etmişik. Əlavə kapitalı cəmləşdirmək üçün kifayət qədər vaxt var", - Orucov vurğulayıb.
Onun sözlərinə görə, AMB bu məsələdə çevik siyasət aparır.
"Bizim artıq belə təcrübəmiz olub. Sonuncu dəfə kapitallaşmaya qarşı tələbi 2,5 milyon manatdan 10 milyon manatadək artırmışıq. Biz bu məsələyə həmişə ətraflı yanaşmışıq. Hesab edirik ki, bank sektorunun yeni tələbə cavab vermək üçün kifayət qədər potensialı var. Hazırda sistem aktivlərinin 70 faizindən çoxuna malik banklar artıq 50 milyon manatı ötən kapitala sahibdirlər. Fikrimizcə, qalan banklar kapitalı normativ səviyyəyə çatdırmaq üçün kifayət qədər potensiala malikdirlər", - Orucov qeyd edib.
Onun sözlərinə görə, AMB bu qərarın yarada biləcəyi ciddi təhlükə və problemlər görmür.
