...

Göyçay şəhərinin su təchizatı və kanalizasiya sistemləri yenidən qurulur (FOTO)

Biznes və iqtisadiyyat xəbərləri Materials 17 Oktyabr 2012 15:52 (UTC +04:00)
Cari ilin sentyabr ayından “Su təchizatı və kanalizasiya investisiya proqramı” çərçivəsində Göyçay şəhərinin su təchizatı və kanalizasiya sistemlərinin yenidən qurulmasının ikinci mərhələsinə başlanılıb.
Göyçay şəhərinin su təchizatı və kanalizasiya sistemləri yenidən qurulur (FOTO)

Azərbaycan, Bakı, 17 oktyabr /Trend/

Cari ilin sentyabr ayından "Su təchizatı və kanalizasiya investisiya proqramı" çərçivəsində Göyçay şəhərinin su təchizatı və kanalizasiya sistemlərinin yenidən qurulmasının ikinci mərhələsinə başlanılıb. Layihəyə uyğun olaraq, Göyçay şəhərinin su təchizatı və kanalizasiya şəbəkələri yenidən qurulacaq, sugötürücü qurğuların tikintisi başa çatdırılacaq.

"Azərsu" ASC-nin mətbuat xidmətindən Trend-ə verilən məlumata görə, eyni zamanda, şəhərin içməli su şəbəkəsinin yenidən qurulması məqsədilə 54,3 kilometr uzunluğunda şəhərdaxili su xətləri çəkilməlidir.

Qeyd edək ki, birinci mərhələdə Göyçay şəhərində uzunluğu 24 kilometr olan paylayıcı su xətti çəkilib. Sentyabr ayında başlanmış ikinci mərhələdə isə 4827 metr uzunluğunda su xətti çəkilərək bu göstərici 29 kilometrə çatdırılıb və bu sahədə işlərin 53 faizi yerinə yetirilib. Hazırda obyektlərin su şəbəkəsinə qoşulma işləri aparılır və ikinci mərhələdə layihə üzrə 3975 ünvanın 553-də qoşulma işləri başa çatdırılıb.

İkinci mərhələ çərçivəsində işlər başlanandan Göyçay şəhərində 4200 metr uzunluğunda kanalizasiya xətti çəkilib. Bununla da 49,1 km olan kanalizasiya xətlərinin tikilən hissəsi 27 kilometrə çatdırılaraq işlərin 55 faizi yerinə yetirilib. Hazırda kanalizasiya xətlərinin çəkilişi ilə yanaşı, ünvanların kanalizasiya şəbəkəsinə qoşulması aparılır və 2340 ünvanın 700-də bu işlər yekunlaşıb.

Göyçay şəhərini keyfiyyətli və dayanıqlı içməli su ilə təmin etmək üçün hər birinin dərinliyi 140 metr olan 2 subartezian quyusu qazılacaq. Şəhərinin su təchizatının yaxşılaşdırılması məqsədilə bu vaxtadək 3 subartezian quyusu qazılıb, sugötürücü kamera daxil olmaqla həcmi 2500 kubmetr olan yeni su anbarı, xlorator və laboratoriya binası, nasos stansiyası tikilib. Şəhərdə toplanmış məişət-tullantı sularının təmizlənməsi üçün çirkab sutəmizləyici qurğunun tikintisi nəzərdə tutulur. Layihəyə uyğun olaraq, Göyçay şəhərinin küçələrində 312 yanğın hidrantı da quraşdırılacaq.

Göyçay şəhərinin su təchizatı və kanalizasiya sistemlərinin yenidən qurulması layihəsinin icrası nəticəsində 38 minə qədər şəhər sakininin içməli su təchizatı və kanalizasiya xidmətlərindən istifadəsi yaxşılaşacaq.

Qeyd edək ki, layihə üzrə həyata keçirilən işlərlə tanış olmaq məqsədilə Asiya İnkişaf Bankının şəhər təsərrüfatı şöbəsinin baş mütəxəssisi Vijay Padmanabhanın başçılıq etdiyi nümayəndə heyəti Göyçay rayonunda olub. İşlərin gedişindən razı qalan mütəxəssis bu layihə çərçivəsində Göyçay şəhəri ilə yanaşı, Ağdaş, Beyləqan, Balakən və Ağcabədi şəhərlərinin də su təchizatı və kanalizasiya sistemlərinin yenidən qurulacağını bildirib.

Məqalədə:
Xəbər lenti

Xəbər lenti