Azərbaycan, Bakı, 21 noyabr /Trend, müxbir A.Axundov/
Azərbaycanın Ekologiya və Təbii Sərvətlər Nazirliyi 2013-cü ildə platin qrupundan olan metal yataqlarının axtarışına başlayacaq. Bu barədə çərşənbə günü Trend-ə nazirlik yanında Milli Geoloji Kəşfiyyat Xidmətinin rəisi Qazi Hacıkərimov bildirib.
"İşlər gələn il başlayacaq və dövlət vəsaitləri hesabına dövlət sifarişi ilə aparılacaq", - Hacıkərimov deyib.
Azərbaycanda ilk dəfə platin 2011-ci ildə Şəmkir rayonu ərazisində aşkar edilib, sonra bu metal ölkənin digər rayonlarında tapılıb.
"Cihazlarımız platinin mövcud olduğunu qeydə alıblar, lakin əsaslı geoloji işlərin aparılması lazımdır. Hələlik hər hansı yataq haqqında danışmaq tezdir", - Hacıkərimov vurğulayıb.
