Azərbaycan, Bakı, 26 noyabr /Trend, müxbir A.Tağıyeva/
Türkiyə ölkədə mülk sahibi olan xarici vətəndaşlar üçün daimi yaşayışı təsdiq edən sənədin fəaliyyət müddətini 3 aydan 1,5 ilədək uzatmaq niyyətindədir. Trend-in bazar ertəsi "Sabah" qəzetinə istinadən verdiyi məlumata görə, bunu Türkiyənin ətraf mühitin mühafizəsi və şəhər inkişafı naziri Ərdoğan Bayraktar deyib.
Bu qərar xarici vətəndaşlara Türkiyədə mülk almağa icazə verən qanun çərçivəsində qəbul edilib.
Bayraktarın sözlərinə görə, gələcəkdə bu qərar Türkiyə vətəndaşlığının verilməsi prosesini sürətləndirməyə imkan verəcək.
Xarici vətəndaşlara Türkiyədə daşınmaz əmlak almağa icazə verən qanunun qəbulundan etibarən (2012-ci il avqust ayı) xaricilər ölkədə ümumi sahəsi 1,16 milyon kvadratmetr olan mülk əldə ediblər. Bu barədə daha əvvəl Türkiyənin torpaq kadastrı və alqı-satqı işləri üzrə dövlət orqanın hesabatında deyilirdi.
