Azərbaycan, Bakı, 29 noyabr /Trend, müxbir A.Axundov/
Azərbaycan Maliyyə Nazirliyi yanında Dövlət Sığorta Nəzarəti Xidməti (DSNX) və İcbari Sığorta Bürosu avtonəqliyyat vasitəsi sahibləri üçün yeni xidməti işə salır. Bu barədə cümə axşamı Trend-ə DSNX rəhbəri Namiq Xəlilov bildirib.
"Yaxın vaxtlarda biz İcbari Sığorta Bürosunun informasiya sistemi vasitəsilə yeni xidməti istifadəyə verəcəyik. Xidmət sığorta şəhadətnaməsinin qeydiyyatı və onun İcbari Sığorta Bürosunun informasiya sisteminə əlavə edilməsi zamanı sığortaçılara SMS məlumatların avtomatik göndərilməsini nəzərdə tutur. Məlumat sığorta şəhadətnaməsi, sığorta qeydiyyatı haqqında, habelə sığortaçıların sığorta ödənişini yalnız bu məlumatı aldıqdan sonra həyata keçirməsi üçün xəbərdarlıqdan ibarət olacaq", - Xəlilov deyib.
Onun sözlərinə görə, bu xidmətin tətbiqi bəzi çatışmazlıqları, xüsusilə, sığorta mükafatını alıb Büronun informasiya sistemində sığorta müqaviləsini qeydə almayan sığorta agentləri tərəfindən pulun mənimsənilməsi hallarını aradan qaldırmağa imkan verəcək.
"SMS məlumatlar, həmçinin müqavilənin vaxtından əvvəl ləğv olunduğu, halda onun müddətinin başa çatması barədə xatırlatma kimi 15 gün ərzində göndəriləcək", - Xəlilov deyib.
Dövlət Xidməti rəhbərinin sözlərinə görə, xidmətin tətbiqinin texniki müddəaları artıq həll edilib və hər üç mobil operatorla razılaşdırılıb. İlin sonuna kimi işə salınacaq xidmətdən istifadə pulsuz olacaq.
