Azərbaycan, Bakı, 26 iyun /Trend, müxbir A.Axundov/
Əmlak Məsələləri Dövlət Komitəsi (ƏMDK) Bakıda yeni avtomobil yolunun tikintisi planı altına düşən daşınmaz əmlak obyektlərinin texniki inventarlaşdırılmasına başlayır. Trend-in məlumatına görə, bu barədə çərşənbə günü komitənin rəsmi mətbuatda dərc edilən məlumatında deyilir.
7 kilometr uzunluğunda 6 zolaqlı yol Ziya Bünyadov prospektinə paralel olacaq və Gənclik meydanını "Koroğlu" metrostansiyası yaxınlığındakı dairə ilə birləşdirəcək. Yolun çəkilməsinin birinci mərhələsində yeni tikilən stadionun ətrafında tikinti altına düşən daşınmaz əmlak obyektlərinin kadastr planlarının tərtib edilməsi və onlardan çıxarışların verilməsi tələb olunur.
Bununla əlaqədar ƏMDK çöl-geodeziya ölçmə və texniki inventarlaşdırma işlərinin təşkili və aparılması üzrə təkliflər sorğusu elan edir.
Təkliflər sorğusunda iştirak etmək üçün sənədlər 8 iyul 2013-cü il tarixədək Hüseyn Cavid prospekti, 31 ünvanına təqdim olunmalıdır.
