Azərbaycan, Bakı, 28 aprel /Trend, müxbir İ.Xəlilova/
Azərbaycanın Ümumdünya Ticarət Təşkilatına (ÜTT) üzv olması üzrə ikitərəfli danışıqların növbəti raundunun 2014-cü ilin iyun-iyul aylarında keçirilməsi gözlənilir. Bunu bazar ertəsi Trend-ə Azərbaycanın ÜTT-yə daxil olması üzrə danışıqlar qrupunun rəhbəri, xarici işlər nazirinin müavini Mahmud Məmmədquliyev deyib.
Onun sözlərinə görə, ÜTT-nin üzv ölkələri ilə görüşlərin keçirilməsi yay sessiyasında müzakirələrə hazırlığın gedişatından asılıdır: "Biz ölkələrin təkliflərini təhlil edəcəyik və görüşün keçirilmə zərurəti haqqında qərar qəbul edəcəyik".
M.Məmmədquliyev bildirib ki, Azərbaycan ölkələrin suallarına cavabları 2014-cü ilin sonuna planlaşdırılmış ÜTT-nin işçi qrupu ilə danışıqların növbəti raundunadək hazırlayacaq.
Qeyd edək ki, Azərbaycan danışıqlara 2004-cü ildə başlayıb.
