Azərbaycan, Bakı, 13 iyul /Trend, müxbir Z.Qurbanova/
Bu ilin yanvar-may aylarında Azərbaycandakı 28 sığorta şirkətinin 9-da sığorta haqlarının artımı, 19-da isə azalması baş verib.
Trend-in məlumatına görə, bu ilin yanvar-may aylarında toplanmış sığorta haqlarının həcminə görə, bazarın lideri "Paşa Sığorta" şirkəti olub. Şirkət ilk 5 ayda 31 milyon manat sığorta haqqı toplayıb. Sonrakı yeri tutan "Atəşgah Həyat" şirkətinin yığımları 20,2 milyon manat, "Paşa Həyat" şirkətində 19,5 milyon manat olub. Sığorta yığımlarının həcminə görə ilk beşliyi "Azərsığorta" DSKŞ (17,4 milyon manat) və "AzSığorta" (15,1 milyon manat) şirkətləri tamamlayır, Ümumilikdə, bazarın yarıdan çoxu, yəni 55,2 %- ilk beşlikdə təmsil olunan şirkətlərin payına düşür.
Ən az sığorta haqqı toplayanlar isə "Azərqarant" (315 min manat), "Əmrah Sığorta" (306 min manat), "Era-Trans" (286 min manat), "Günay Sığorta" (97 min manat), "Çartis Azərbaycan" (39 min manat) və "Royal Sığorta" (2255 manat) olub. Bu şirkətlərin ümumi göstəricisi 1 milyon manatdan bir qədər çox olub və ümumi sığorta yığımlarının 1%-indən daha azını təşkil edib.
Ümumilikdə 28 sığorta şirkətinin 7-də sığorta haqlarının həcmi 10 milyon manatdan artıq, 4 şirkətdə 5-10 milyon manat arasında, 11 şirkətdə 1-5 milyon manat arasında, 6 sığorta şirkətində isə yarım milyon manatdan aşağıdır.
Sığorta ödənişlərinin həcminə görə də lider "Paşa Sığorta" şirkətidir - 11,1 milyon manat. Ödənişlərin həcminə görə sonrakı yerləri "Azərbaycan Sənaye Sığorta" (6,3 milyon manat), "Atəşgah Sığorta" (5,6 milyon manat), "Azərsığorta" DSKŞ (5,4 milyon manat) və "Azsığorta" (3,8 milyon manat) şirkətləri tutur. Bu şirkətlərin ödənişlərinin cəmi 32,2 milyon manat təşkil edir ki, bu da ümumi ödənişlərin da ümumi ödənişin 58,3%-dən artıqdır.
Ən az ödəniş edən şirkətlər isə "Azərqarant" (47,4 min manat), "İpək yolu" (40,4 min manat), "Günay Sığorta" (26,1 min manat), "Royal Sığorta" (8,3 min manat) və "Çartis Azərbaycan" (272 manat) olub. Bu şirkətlərin ümumi göstəricisi təxminən 123 min manat olub ki, bu da ümumi ödənişlərin 0,2%-ni təşkil edir.
Bu ilin yanvar-may aylarında Azərbaycandakı 28 sığorta şirkətinin xətti ilə 186,9 milyon manat sığorta haqqı toplanıb. ASA-nın məlumatına görə, bu, ötən ilin eyni dövrü ilə müqayisədə 18,2 milyon manat və ya 10,8% çoxdur.
2014-cü ilin ilk 5 ayında sığorta şirkətlərinin həyata keçirdiyi sığorta ödənişlərinin məbləği isə 55,2 milyon manat təşkil edib. Bu da 2013-cü ilin eyni dövrünə nisbətən 6,3 milyon manat və ya 13% çoxdur.
Hesabat dövründə sığorta bazarında toplanmış hər 100 manat sığorta haqqı müqabilində 29,5 manat ödəniş həyata keçirilib. Bu göstərici ötən ilin yanvar-may aylarında 29 manat olub.
