Azərbaycan, Bakı, 26 iyun /Trend, müxbir Emin Əliyev/
Azərbaycan banklarının öz risklərinin sığortalanmasına marağı olduqca azdır. Bunu Trend-ə "Bakı Sığorta" ASC-nin İdarə heyətinin sədr müavini Ramin Məmmədov deyib.
Onun sözlərinə görə, banklarda müasir daxili auidit sistemi kifayət qədər yaxşı inkişaf etsə də, ilk növbədə, insan amili ilə bağlı hələ də mənfi hallar baş verir: "Bunu yaxşı anlayan banklar öz risklərini sığortalamağa üstünlük verirlər".
R.Məmmədov qeyd edib ki, Azərbaycanda bu cür risklərin 90 faizi xaricdə təkrar sığortalanır: "Buna səbəb yerli bazarın bu cür öhdəliyi tam üzərinə götürə bilməməsidir. Xaricdə bu sahədə lazımi təcrübəsi və ekspertləri olan kifayət qədər şirkət var. Məsələn, şirkətimiz Böyük Britaniyanın qabaqcıl təkrar sığorta şirkətlərinin biri ilə əməkdaşlıq edir və ötən il Azərbaycanın fırıldaqçılığın qeydə alındığı banklarından birinə 1,7 milyon manat həcmində iri sığorta ödənişini etdik".
Qeyd edək ki, Maliyyə Nazirliyinin məlumatına görə, "Bakı Sığorta" 2014-cü ilin ilk 5 ayında 1,14 milyon manat sığorta haqqı toplaya bilib. İlin əvvəlindən şirkət tərəfindən sığorta halları üzrə 0,99 milyon manat ödəniş edilib.