Azərbaycan, Bakı, 8 aprel /Trend, müxbir Azad Həsənli/
2015-2020-ci illərdə inkişaf etməkdə olan ölkələrdə iqtisadi artım tempi azalaraq orta hesabla 5,2 faiz təşkil edəcək. Trend-in məlumatına görə, bu barədə Beynəlxalq Valyuta Fondunun "World Economic Outlook" analitik icmalında deyilir.
İcmalda bildirilir ki, 2008-2014-cü illərdə inkişaf etməkdə olan ölkələrdə iqtisadi artım orta hesabla 6,5% faiz təşkil edib.
Fondun sənədində qeyd olunur "Azalma əhalinin yaşlanması, kapital artımına təsir edən struktur məhdudiyyətləri, bu ölkələrin qabaqcıl texnologiyaya yaxınlaşması nəticəsində məhsuldarlığın məcmu faktorunun ləng artımı ilə əlaqədardır".
BVF-nin proqnozlarına görə, 2008-2014-cü illərdə inkişaf etmiş ölkələrdə potensial iqtisadi artım tempi 1,3% olub, növbəti - 2015-2020-ci illərdə isə 1,6%-dək təşkil edəcək.