İyulun 21-də Orta Asiya və Cənubi Qafqaz regionları üzrə əlaqələndirici Racendra Parodanın rəhbərlik etdiyi İCARDA (International Center for Agricultural Reseach in the Dry Areas) nümayəndə heyətinin Bakıya səfəri başa çatır.
Kənd Təsərrüfatı Nazirliyinin elmi-aqrar mərkəzindən Trend ə verilən məlumata görə, iyulun 20-də Nazirlikdə təşkilat tərəfindən həyata keçirilən və Mərkəzi Asiya və Cənubi Qafqaz ölkələrində kənd təsərrüfatının sabit inkişafına yönəldilmiş layihənin təqdimat mərasimi keçirilib.
Mərasimdə Kənd Təsərrüfatı Nazirliyinin nümayəndələri, elmi-tədqiqat institutlarından mütəxəssislər iştirak ediblər. Bu layihə Qazaxıstan, Özbəkistan, Türkmənistan, Qırğızıstan, Tacikistan, Azərbaycan, Gürcüstan və Ermənistanın daxil olduğu 8 ölkəni əhatə edir. Təqdimatdan sonra aqrar sahədə əməkdaşlığın inkişaf məsələləri, bu istiqamətdə birgə işlərin genişləndirilməsi imkanları müzakirə olunub.
Elə həmin gün İCARDA nümayəndələri kənd təsərrüfatı nazirinin müavini Aslan Aslanovla görüşərək perspektiv əməkdaşlıq məsələlərini müzakirə ediblər.