Ölkədə Milli Təkrar Sığorta Şirkəti (MTSŞ) adlı yeni şirkət yaradılacaq. Bu barədə Azərbaycan Sığortaçılar Birliyinin prezidenti Xəyal Məmmədxanlı Trend xəbər agentliyinə müsahibəsində bildirib. Onun sözlərinə görə, bu şirkətin yaradılmasında əsas məqsəd ölkənin sığorta bazarındakı kapitalın xaricə axınının qarşısını almaqdır. X.Məmmədxanlı hazırda ölkədə fəaliyyət göstərən sığorta şirkətləri tərəfindən yığılan sığorta haqlarının 70-75%-nin təkrar sığorta ilə xaricə getdiyini qeyd edib. Çünki ölkədəki şirkətlərin risk saxlama imkanları çox kiçik - jəni 2,4 milyon dollardır. MTSŞ-nin yaranması isə pulların müəyyən hissəsinin ölkədə qalmasına şərait yaradacaq. Yeni sığorta şirkətinin ilin sonuna kimi yaradılmasının nəzərdə tutulduğunu söyləyən X.Məmmədxanlı MTSŞ-nin nizamnamə kapitalının təqribən 10 milyon dollar həcmində olacağını bildirib. Şirkətin 20-yə yaxın yerli sığorta şirkəti tərəfindən təsis olunması nəzərdə tutulur.
Lakin yeni şirkətin kapitalının həcminin böyük olması üçün burada beynəlxalq maliyyə
qurumlarının da iştirakı istisna edilmir.
Qeyd edək ki, hazırda ölkədə 22-si yerli və 7-si xarici kapitallı 29 sığorta şirkəti fəaliyyət göstərir ki, bunların da nizamnamə kapitallarının ümumi həcmi 24 milyon dollardır.
