Vergilər Nazirliyi yanında Vergi cinayətlərinin ibtidai araşdırılması Departamenti xəbər verir ki, Texnikabankda, Debütbankda və digər kommersiya banklarında aparılan yoxlamalar bu qurumların fəaliyyətinin araşdırılması məqsədi daşımır. Bu barədə Trend nazirliyin press-relizinə istinadən məlumat verir.
Bununla əlaqədar, həm əmanətçilər, həm də bu banklarla əməliyyat aparan ayrı-ayrı biznes subyektləri tərəfindən həmin qurumlara inamın şübhə altına alınmasına heç bir əsas yoxdur. Aparılan vergi yoxlamaları bank strukturlarının əməliyyatlarının deyil, ayrı-ayrı müştərilərin əməliyyatlarının araşdırılmasına yönəlib.
Press-relizdə o da deyilir ki, vergi dələduzluğu və vergidən yayınma hallarına qarşı mübarizənin gücləndirilməsi istiqamətində səmərəli tədbirlərin görülməsi Nazirliyin qarşısında duran mühüm vəzifələrdən biridir. Bəzi banklarda aparılan vergi yoxlamaları saxta hesab-fakturalardan istifadə edən ƏDV fırıldaqçılarının aşkara çıxarılması, onların büdcədən yayındırdığı vəsaitin məbləğinin müəyyən olunması və həmin işbazlara qarşı qanunla nəzərdə tutulmuş tədbirlərin görülməsinə xidmət edir.