Hesablama Palatasının 2006-cı il üzrə İş Planı təsdiqlənib. Bu barədə Trend ə Azərbaycanın Hesablama palatasında bildirilib.
İş Planında Palatanın qanunvericiliklə müəyyən edilmiş funksiyalarının əhatə dairəsi əvvəlki illərə nisbətən xeyli genişləndirilib. Bununla belə, İş Planının yerinə yetirilməsinin reallığı da nəzərə alınıb. Iş Planında "Büdcə sistemi haqqında" AR Qanununa uyğun olaraq Dövlət büdcəsinin, Dövlət Sosial Müdafiə Fondunun, Neft Fondunun, Naxçıvan MR Dövlət büdcəsinin auditləri və bələdiyyələrin maliyyə-büdcə ekspertizası kimi vəzifələrin həyata keçirilməsi nəzərdə tutulub.
Nəzarət tədbirlərinin əsas hissəsi Dövlət büdcəsinin icrasının əsasən bu istiqamətlərinə həsr olunub- Dövlət büdcəsi gəlirlərinin auditi- (əvvəlki illərdən fərqli olaraq cari ildə bu istiqamətdə fəaliyyətin genişləndirilməsi nəzərdə tutulur).
Nəzarət fəaliyyəti vergi gəlirləri üzrə iri vergi ödəyicilərində vergilərin hesablanması və ödənilməsi mexanizminin qiymətləndirilməsi və büdcə strukturunda mühüm paya malik olan əsas vergi növləri üzrə daxilolmaların qiymətləndirilməsi; vergi gəlirləri - hüquqi şəxslərin vergi ödəmələri, Əlavə dəyər vergisi və aksizlər, fiziki şəxslərin gəlir vergisi və sadələşdirilmiş vergilər kəsimində qiymətləndirilməsi kimi mövzuları əhatə edir.
Palatada hesab edilir ki, bunlar həcm etibarı ilə vergi gəlirlərinin əsas hissəsini əhatə edir və həmin növlər üzrə daxilolmaların səviyyəsi həmişə Palatanın rəy və məlumatlarında diqqət mərkəzindədir. Digər tərəfdən, HP iri vergi ödəyiciləri kateqoriyasına aydınlıq gətirilməsini də vacib hesab edir.Çünki son iki-üç ildə belə təsərrüfat subyektlərində aparılmış nəzarət tədbirləri zamanı çoxsaylı problemlərin mövcud olması müəyyən edilib. Burada, həm də, Rusiya Federasiyası Hesablama Palatası ilə birgə tədbirlər çərçivəsində qarşılıqlı ticarətdə gömrük nəzarətinin təşkilinin araşdırılması da nəzərdə tutulur.