Dünya Bankının Direktorlar Şurası "Azərbaycanın institusional quruculuğuna texniki yardım" (İVTA-2) üzrə ikinci layihə çərçivəsində kreditin restrukturlaşdırılması haqqında memorandumu nəzərdən keçirib. Bu barədə Trend ə bankın Bakı nümayəndəliyindən məlumat verilib. Kreditin 3,560 mln SDR ($5,130 mln-5,140 mln) məbləğində istifadə edilməmiş hissəsi "quş qripi" ilə mübarizə üzrə tədbirlərə yönəldiləcək.
Bu, fövqəladə hallar üçün nəzərdə tutulmuş layihələr silsiləsindədir, buna görə də layihə olduqca tez hazırlanıb və qısa müddət ərzində təqdir edilib. Layihə İVTA-2 kredit sazişinə əlavələrin imzalanmasından sonra həyata keçiriləcək. Vəsaitlər Dövlət Baytarlıq Xidməti və laboratoriyaların texniki bazasının möhkəmləndirilməsi məqsədilə avadanlıqların alınması üçün nəzərdə tutulub.
Səhiyyə üzrə ikinci amil də avadanlıqların alınmasını, treninqlərin keçirilməsini, laboratoriyaların reabilitasiyasını nəzərdə tutur. Layihə çərçivəsində texniki yardım göstəriləcək və kommunikasiya strategiyası hazırlanacaq.