Aprel-mart aylarında Dünya Bankının Direktorlar Şurasında bankın Azərbaycanla tərəfdaşlıq strategiyasının təsdiqlənməsi gözlənilir. Bu barədə Trend ə hökumətdən məlumat verilib. Azərbaycan hökuməti və bank arasında danışıqlar artıq başa çatıb. Bank rəhbərliyi artıq strategiyanı nəzərdən keçirib və bəyənib. Yalnız bir neçə formal prosedurları yerinə yetirmək lazımdır.
Layihələrin təqribi dəyəri müəyyən edilib və bu rəqəm layihələrin hazırlanması zamanı dəqiqləşdiriləcək. Bütövlükdə, strategiyanın həyata keçirildiyi müddət ərzində (2006-2009-cu illər) $1,2 mlrd ehtiyatda saxlanılıb. Beynəlxalq İnkişaf Assosiasiyasından fərqli olaraq bankın digər bölməsi Beynəlxalq Yenidənqurma və İnkişaf bankının kreditinin həcmi məhdud deyil. Məsələn, yolların inşası üçün $500 mln nəzərdə tutulsa da, bank daha çox vəsait ayırmağa hazırdır.
Bank hər il BİA-nın ölkə üçün ayıracağı güzəştli kreditlərin mümkün həcmini müəyyən edəcək. 2006-cı maliyyə ilində (DB-də bu, iyunun 30-da başa çatır) $70-80 mln güzəştli kreditin ayrılması müəyyən edilib. 2006-cı maliyyə ili ərzində güzəştli şərtlərlə üç layihənin təsdiqlənəcəyi gözlənilir: məhkəmə-hüquq və səhiyyə sistemlərinin yenidən formalaşdırılması, kənd təsərrüfatının inkişafı və kreditləşdirilmə.
