Mayın 26-da Azərbaycanın Ümumdünya Ticarət Təşkilatına (ÜTT) daxil olmasına hazırlıq üzrə Dövlət Komissiyası iqtisadi inkişaf naziri Heydər Babayevin sədrliyi altında 6-cı iclasını keçirəcək. Bu barədə Trend ə hökumətdən məlumat verilib. Onun vəzifəsinə ÜTT-na daxil olmaq üçün hazırlıq prosesinin sürətləndirilməsi tədbirlər planının, danışıqların növbəti mərhələsinə kimi yerinə yetirilməli olan işlərin hazırki vəziyyəti və onların vaxtında yerinə yetirilməsi üçün tədbirlərin müzakirəsi daxildir. Növbəti danışıqların noyabrda Cenevrədə keçiriləcəyi ehtimal olunur.
Hazırda ABŞ, Kanada, AB, Avstraliya, Yaponiya və Çinin Tayvan əyalətindən olan sualların cavablarının tərtibi üzrə iş aparılır.
"ÜTT-yə üzv olan ölkələrin Azərbaycana vermək istədikləri suallar əsasən alınıb və hazırda cavablar üzərində iş gedir. Digər tərəfdən bizim gömrük tarifləri və xidmətləri ilə bağlı təkliflərimiz üzərində, ümumilikdə, sənədlər paketi çərçivəsində bütün istiqamətlərdə iş aparılır. Bu barədə Trend ə xarici işlər nazirinin müavini Mahmud Məmmədquliyev məlumat verib. ÜTT-na daxil olma prosesi bir neçə parametrlərə malikdir: tariflər və xidmətlər üzrə ikitərəfli, kənd təsərrüfatına və ixrac subsidiyalarına daxili dəstək üzrə çoxtərəfli danışıqlar, üçüncü istiqamət Azərbaycanda mövcud ticarət rejimini müzakirə edən işçi qrupun işi.
Artıq Nazirlər Kabinetinə təqdim olunmuş tədbirlər planına görə, qanunvericilikdə dəyişikliklər 1-2 il ərzində həyata keçirilməlidir. ÜTT-yə daxilolma üzrə danışıqlar prosesinin başa çatması bundan asılıdır.
