Milli Məclisin Regional Məsələlər Daimi Komissiyası payız sessiyasının müzakirəsinə bir neçə qanun layihəsi təqdim edəcək. Bu barədə Trend ə Milli Məclisin Regional Məsələlər Daimi Komissiyasından bildirilib.
Komissiyadan qeyd olunub ki, artıq bu istiqamətdə iş aparılır. Payız sessiyasına təqdim ediləcək qanun layihələri arasında "Bələdiyyələrlə yerli icra hakimiyyəti orqanlarının qarşılıqlı fəaliyyəti haqqında", "Bələdiyyə üzvlərinin və qulluqçularının sosial müdafiəsi haqqında", "Coğrafi obyektlərin adları haqqında" qanun layihələri var.
Qeyd edək ki, qanun layihələri komissiya üzvlərinin, mütəxəssislərin rəy və təklifləri əsasında hazırlanır.
"Kürdəmir və Şəmkir, Xocalı, Goranboy (Tatarlı kəndi) rayonlarının inzibati ərazi bölgəsində qismən dəyişiklik edilməsi barədə" məsələ ilə bağlı bölgələrdən müraciət və təkliflər daxil olub. Təkliflər nəzərə alınaraq sənədə daxil ediləcək.