Azərbaycanın İqtisadi İnkişaf Nazirliyi Antiinhisar Siyasəti Departamentinin ABŞ-ın Beynəlxalq İnkişaf Təşkilatı ilə birgə layihəsi çərçivəsində təşkil olunan 4 günlük "Üfiqi və şaquli sazişlərin təhqiqi və rəqabət analizi" seminarı başa çatıb.
Trend agentliyinin nazirliyə istinadən yaydığı məlumata əsasən, seminarda Azərbaycanın İqtisadi İnkişaf Nazirliyi, ABŞ-ın Federal Ticarət Komissiyası, Estoniya və Latviyanın rəqabət üzrə şuralarının nümayəndələri iştirak edib.
Tədbirdə üfiqi və şaquli sazişlərin geniş hüquqi və iqtisadi analizi, müstəqil təsərrüfat subyektləri tərəfindən imzalanmış sazişlərin iqtisadiyyata təsiri, sazişlərin analizinin üsul və vasitələri müzakirə olunub. Seminarda Azərbaycan, ABŞ, Latviya və Estoniyanın təcrübəsinin müqayisəsi aparılıb.
Rəqabət üzrə qurumların ekspertlərinin iştirakı ilə Baltikyanı ölkələrin kartel sazişlərinin araşdırılması, eləcə də ABŞ, Estoniya və Latviyanın qərabət qurumlarının təcrübəsi müzakirə mövzusu olub.
