Azərbaycanın Maliyyə Nazirliyi uşaqların erkən inkişafı layihəsi üçün Asiya İnkişaf Bankının (AİB) kreditini cəlb etməkdən imtina edir. Maliyyə Nazirliyindən Trend ə verilən xəbərə görə, bu məqsədlə nazirlik Nazirlər Kabinetinə rəsmi müraciət hazırlayır.
İmtina etmənin səbəbi layihənin bəzi komponentlərinin kreditin hesabına maliyyələşdirilməsinin yolverilməz olmasıdır. Çünki bu komponentləri şəxsi vəsaitlər hesabına həyata keçirmək olar. Həm də məsləhətçilərin xidmətlərinin AİB-in kredit resursları hesabına həyata keçirilməsi və məsləhətçilərə sərf olunan xərclərin çox olması onları qane etmir.
Layihə çərçivəsində 12 pilot rayonunda təxminən 240 uşaq bağçasının təmiri və tikintisi təklif olunub. Bura Bakının yalnız üç rayonu daxildir, qalanları isə (9) ölkənin müxtəlif bölgələrindədir (Sumqayıt, Naxçıvan, Balakən, Bərdə, Quba, Cəlilabad, Şamaxı, Tovuz və Zərdab). 2006-2010-cu illərdə həyata keçirilməsi nəzərdə tutulan uşaqların erkən yaşda inkişafı layihəsi (uşaq bağçaları sisteminin inkişafı) beş tərkib hissədən ibarətdir. Birinci komponentə erkən yaşlı uşaqların təhsil sisteminin təkmilləşdirilməsi daxildir. İkinci, uşaq bağçalarında düzgün və sağlam qidalanmanın təmin edilməsidir. Uşaq bağçalarında istilik sisteminin bərpa edilməsi, sanitar işlərinin görülməsi nəzərdə tutulub. Respublikada həmçinin əlavə olaraq beş alternativ məktəbəqədər müəssisələrin yaradılması da nəzərdə tutulub. İdarə sisteminin yaxşılaşdırılması üçün uşaq bağçalarının tərbiyəçiləri, həmçinin onların rəhbərləri üçün treninq və seminarlar keçiriləcək.
AİB layihənin gerçəkləşdirilməsinə Asiyanın inkişaf fondunun güzəştli şərtləri ilə (ödəməni 8 il gecikdirməklə, güzəşt dövrü ərzində illik 1%, həmin dövr bitdikdən sonra isə illik 1,5% faiz dərəcəsi ilə 32 il müddətinə) təxminən 19 mln. ABŞ dolları verməyə hazır olduğunu bildirib. AİB-nin Yaponiya xüsusi fonddan verilmiş 750 min ABŞ dolları məbləğində qrantı hesabına layihə məsləhətçi Helsinki Consulting Group və onun subpodratçısı ASPI Consulting Engineers Inc. tərəfindən hazırlanıb.
