Azərbaycan Beynəlxalq Bankı (ABB) xaricdə törəmə banklarını genişləndirmək planları barədə açıqlama verib. ABB-nin idarə heyətinin sədri Cahangir Hacıyevin Trend ə verdiyi məlumata görə, Gürcüstanda da "ABB-Moskva"ya bənzər törəmə qurumun açılması bankın planına daxildir. Onun sözlərinə görə, müvafiq qərar artıq qəbul olunub və bu, yaxın vaxtlarda həyata keçiriləcək.
Rusiyada fəaliyyət göstərən törəmə bank da öz şəbəkəsini genişləndirir. Hazırda "ABB-Moskva"nın Sankt-Peterburqda, Yekaterinburqda filialları fəaliyyət göstərir, Moskvada isə 10-dək filial açılmaq üzrədir.
Bir qədər əvvəl ABB Türkiyə, Dubay, Lüksemburq və Ukraynada nümayəndəliklərinin açılması planları barədə açıqlama vermişdi.
Hazırda bankın Almaniyada və Böyük Britaniyada nümayəndəlikləri var. ABB bununla kifayətlənmək niyyətində deyil və fəaliyyətini yaxın və uzaq xaricdə inkişaf etdirməyi planlaşdırır.
