Noyabr ayının ortalarında zibil emalı zavodunun tikinti layihəsinin məsləhətçisi, Yaponiyanın EBARA şirkəti Azərbaycan hökümətinə layihənin ilkin texniki-iqtisadi əsaslandırmasını təqdim etməyi planlaşdırır. Ölkənin Nazirlər Kabinetindən Trend ə verilən məlumata görə, TİƏ-nin son variantı 2006-cı ilin sonunadək hazırlanacaq.
Oktyabr ayında EBARA ekspertləri TİƏ üçün lazımi məlumatları toplamaq və Azərbaycan hökümətinin mövqeyini dəqiqləşdirmək üçün növbəti dəfə Azərbaycanda olublar. İqtisadi İnkişaf, Ekologiya və Təbii Ehtiyatlar Nazirlikləri, Bakı şəhəri İcra Hakimiyyəti mütəxəssislərinin təmsil olunduqları İdarələrarası işçi qrupu artıq layihə üzrə texniki tapşırığı şirkətə təqdim edib.
Ölkə hökümətinin planlarına 2007-ci ildə layihənin reallaşdırılması daxildir və bunun üçün xarici mənbələr hesabına 150 mln. ABŞ dollarının cəlb olunması planlaşdırılır.
Layihənin qiyməti ilkin olaraq 350 mln. avro həcmində dəyərləndirilirdi, Avropa bankı bundan 50 mln. avronu ayırmağı təklif edir. Lakin hökümət hələ öz seçimini AYİB-in üzərində saxlamayıb. Əgər maliyyə-texniki sənədlərin hazırlanması üçün Yaponiyanın EBARA şirkətinin cəlb olunacağını nəzərə alsaq, o zaman layihənin reallaşdırılması üçün ucuz yapon vəsaitlərinin qismən cəlb olunacağı istisna olunmur. Hökümət sərt tullantıların emalı üzrə zavodun tikintisini qismən özü maliyyələşdirməyi planlaşdırır. Hökümət hesab edir ki, TİƏ böyük gücə malik bir zavodun və ya Bakının müxtəlif rayonlarında kiçik güclü bir neçə zavodun tikintisinin iqtisadi məqsədəuyğunluğunu göstərməklə, bir neçə variantda olmalıdır. Zavodlar Balaxanı, Suraxanı, Qaradağ rayonlarında, Bakı və Sumqayıt arasındakı şossedə yerləşə bilərlər.
