Azərbaycan Kənd Təsərrüfatı Nazirliyi Mərakeşlə aqrar sahədə əməkdaşlıq haqqında saziş layihəsi hazırlayıb. Bu barədə Trend ə nazirlikdən məlumat verilib.
Aqrar sahənin demək olar ki, bütün istiqamətlərini əhatə edən sənəd bütün əlaqələndirici dövlət idarələri tərəfindən razılaşdırılıb və Nazirlər Kabineti tərəfindən bəyənilib.
"Sənəd baxılması üçün Mərakeşə təqdim olunub", - deyə dövlət qurumundan bildirilib.
Tərəflər arasında əməkdaşlıq haqqında sazişin hazırlanması haqqında razılaşma Mərakeş krallığının kənd təsərrüfatı, kənd yerlərinin və balıqçılığın inkişafı naziri Mohand Lansarın bu ilin avqust ayında Azərbaycana səfəri zamanı əldə olunub. Görüş zamanı kənd təsərrüfatı sahəsinin, demək olar ki, bütün istiqamətləri üzrə məsələlər müzakirə olunub. Danışıqlar zamanı Azərbaycan bölgələrində sitrus və zeytun bağlarının yaradılması, heyvandarlıq üzrə əməkdaşlığın inkişaf etdirilməsi, eləcə də elmi tədqiqatların aparılmasının mümkün olduğu qeyd olunub.
Krallığın naziri əməkdaşlıq istiqamətlərinin daha konkret müəyyən olunması məqsədilə İ.Abbasovu və Kənd Təsərrüfatı Nazirliyinin mütəxəssislərini Mərakeşə dəvət edib.
