Gələn həftə Azərbaycanda "çirkli" pulların yuyulması və terrorun maliyyələşdirilməsi ilə mübarizə istiqamətində məsləhətləşmələrin aparılması üçün Avropa Şurasının eksperti Klaudio Stroliqonun Bakıya səfər edəcəyi gözlənilir.
Cümə günü AMB-nin baş direktoru, "çirkli" pulların yuyulması ilə mübarizə üzrə idarələrarası işçi qrupunun rəhbəri Rüfət Aslanlının Trend ə verdiyi xəbərə görə, o, 30 oktyabr 2006-cı il tarixdə Bakıda ABŞ-ın Azərbaycandakı səfirliyi, Avropa Şurası və Azərbaycan hökuməti tərəfindən təşkil olunmuş "Pulların yuyulması, terrorun maliyyələşdirilməsi və digər maliyyə cinayətləri ilə mübarizədə hüquq çərçivələri" mövzusunda keçirilən konfransda iştirak edib.
Bu istiqamətlərdə cari vəziyyətin və sonrakı nəticələrin Azərbaycan hökuməti ilə müzakirə edilməsi üçün 24 yanvar 2007-ci il tarixdə ABŞ Ədliyyə Nazirliyinin nümayəndəsi Bakıda olub.
Beynəlxalq təşkilatlar milli strategiya yaratmağa çağırıb və bir neçə il ərzində Azərbaycan ölkə başçısının tapşırıqları əsasında pulların yuyulması, beynəlxalq cinayətkarlıq, korrupsiya, insan alveri üzrə mübarizə istiqamətində hüquq mühafizə orqanlarının fəaliyyətinin gücləndirilməsi üzrə tədbirlər görür. Bununla yanaşı, BMT, FATF Konvensiyalarında nəzərdə tutulmuş normalara uyğun institusional islahatlar həyata keçirilib.
"Pulların yuyulması və terrorun maliyyələşdirilməsi ilə mübarizə haqqında" hazırlanmış qanun layihəsində digər ölkələrin təcrübəsi və beynəlxalq prinsiplər nəzərə alınıb. O, maliyyə nəzarətini həyata keçirən orqana tələbləri və öhdəlikləri, maliyyə kəşfiyyatı orqanının yaradılmasını, terrorun maliyyələşdirilməsi və bu cinayətlə mübarizə üçün müvafiq orqanlara yardımın göstərilməsi üzrə məlumatların yığımını müəyyən edir. R.Aslanlının sözlərinə görə, olan məlumatlara əsasən qanun layihəsinin Milli Məclisin yaz sessiyasında baxılması nəzərdə tutulub.
Hazırda həmçinin maliyyə kəşfiyyatı orqanının yaradılması üzrə iş görülür. Dünyada maliyyə kəşfiyyatı orqanının yaradılmasının 4 modeli mövcuddur - polis, inzibati, hibrid və prokuror. R.Aslanlı hesab edir ki, Azərbaycan üçün münasib olan model qanunda göstəriləcək.
