Azərbaycan, Bakı /müx. Trend İ.Xəlilova/ Azərbaycan hökuməti ilə Dünya Bankı Azərbaycanın kiçik şəhərlərində su təchizatı və kanalizasiya sisteminin təkmilləşdirilməsi layihəsi ilə bağlı rəsmi danışıqlara başlayıblar. Bu gün Bakıda start götürən danışıqlar sabah davam etdiriləcək.
Dünya Bankının adından danışıqları layihələr qrupunun rəhbəri Andreas Rodenin rəhbərlik etdiyi missiya, Azərbaycan tərəfindən isə "Azərsu" SC aparır.
Dünya Bankı 20 şəhərdə su xətlərinin və kanalizasiya sistemlərinin bərpası üçün 230 milyon dollar vəsait ayıracaq. Pullar 115 milyon dollarlıq iki tranş vasitəsi ilə veriləcək. Kredit vəsaitləri Beynəlxalq Yenidənqurma və İnkişaf Bankının xətti ilə ayrılacaq (20 il müddətinə, güzəştli müddət-5 il, faiz qoyuluşu isə müzakirə mərhələsindədir).
İlkin mərhələdə 10 rayonda su xətlərinin və kanalizasiya sistemlərinin bərpası gözlənilir. Bunlar Ağdam, Biləsuvar, Göranboy, Quba, Xaçmaz, Zaqatala və digərləridir.
Dünya Bankının Azərbaycan hökuməti ilə tərəfdaşlıq strategiyasına (2007-2010-ci illər) əsasən, kreditin təsdiqlənməsi 2007-ci ilin iyunun sonunadək gözlənilir. 2009 və 2010-cu illərdə Azərbaycanın su təchizatı və kanalizasiya sisteminin inkişafına daha 200 milyon dollar ayrılacaq.
