Azərbaycan, Bakı / Trend müxbir İ.Xəlilova / BMT-nin Asiya və Sakit Okean Hövzəsi Ölkələri üçün Sosial və İqtisadi Komissiyasının (UNESCAP) ekspertləri Amitava Mixerce və Yevqeni Germanın Bakıya səfəri başa çatıb. İqtisadi İnkişaf Nazirliyindən bazar ertəsi verilən məlumata görə, səfərin məqsədi "Azərbaycanda gəlirlərin və iş yerlərinin yaradılmasının planlaşdırılması, monitorinqi və qiymətləndirilməsinin cari sisteminin tətbiqi" layihəsinin icrasına nəzarətin həyata keçirilməsi olub. Layihənin reallaşması UNESCAP və İqtisadi İnkişaf Nazirliyinin elmi-tətdiqat institutu arasında 2007-ci il iyulun 2-də imzalanmış müqavilənin əsasında başlanıb.
Səfər çərçivəsində UNESCAP ekspertləri İqtisadi İnkişaf, Əmək və Əhalinin Sosial Müdafiəsi nazirlikləri, Dövlət Statistika Komitəsİ, BMT-nin Azərbaycandakı nümayəndəliyinin rəsmiləri, həmçinin İqtisadi İslahatlar Elmi-Tədqiqat İnstitutunda layihə ilə bağlı müzakirələr aparıblar.
Layihə çərçivəsində ekspertlər Xaçmaz və Salyan bölgələrində də olublar. Bu rayonlarda ekspertlər İcra hakimiyyətlərində olub, yerli sakinlərlə görüşərək onlara layihənin əhəmiyyəti barədə məlumat verib və sorğular aparıblar. Səfərin nəticəsi olaraq İqtisadi İslahatlar Elmi-Tədqiqat İnstitutunun əməkdaşları UNESCAP ekspertləri ilə birlikdə ölkəmizlə bağlı hesabat hazırlayacaq. Bu hesabatın cari ilin oktyabr ayında ölkəmizdə keçirilməsi nəzərdə tutulan seminar zamanı təqdim edilməsi planlaşdırılır.