Azərbaycan, Bakı / Trend , müxbir U.İsmayılova/ Azərbaycanda mebel istehsalı üzrə Azərbaycan-Belarus birgə zavodu tikiləcək. Bu barədə şənbə günü "Azərles" QSC-nin direktoru Savalan Cəfərov məlumat verib.
"Azərles" QSC ilə Azərbaycan-Belarus birgə mebel müəssisəsinin yaradılması ilə bağlı bugünkü müqavilə barədə "Qomeldrov" ASC (Belarus) baş direktorunun iqtisadiyyat və marketinq üzrə müavini Nikolay Qevrasyev bir qədər əvvəl məlumat vermişdi.
"İmzalanma günün ikinci yarısında (sentyabrın 8-də) baş tutacaq" - deyə Qevrasyev bildirib.
"Azərles" QSC-nin direktoru Cəfərovun sözlərinə görə, bu müqavilə Azərbaycan və Belarus müəssisələri arasında birgə işlə bağlı birinci mərhələ olacaq. O bildirib ki, müqaviləyə əsasən, "Azərles" Belarus mebelinin satışı ilə məşğul olacaq.
"Birgə fəaliyyətin ikinci mərhələsinə müvafiq olaraq, 2008-ci ilin yanvarında Xırdalan şəhərində mebel istehsalı üzrə birgə zavodun tikintisinə başlanılacaq" - deyə Cəfərov vurğulayıb.
Cəfərovun bildirdiyinə görə, yeni zavodda 150 yeni iş yeri açılacaq. "Burada yalnız yerli mütəxəssislər işləyəcək. Belarus zavodu xammalla təchiz edəcək" - deyə Cəfərov əlavə edib.
"Qomeldrev" - Belarusun ağac emalı, faner-kibrit kombinatı və meşə sənayesi təsərrüfatlarının daxil olduğu ən iri mebel müəssisələrindən biridir.
Şirkətin məhsullarına korpus və ofis mebeli, yataq dəstləri, qonaq və yemək otağı üçün dəstlər, şkaf, stol-stul və karnizlər daxildir.
