Azərbaycan, Bakı, 29 aprel / Trend / Mart ayında ölkənin 41 rayonuna aid elektrik enerjisi şəbəkələrini idarə edən "Azərenerji" Səhmdar Cəmiyyətinin (SC) tədarük olunan enerji üçün vəsait yığımı 89,5 faiz təşkil edib. Bu bərədə SC-dən verilən məlumatda bildirilib. Bu göstərici ödənişlərin 47 faizədək ödənildiyi ötən aylarla müqayisədə əhəmiyyətli dərəcədə artıb. Havaların istiləşməsi ilə əlaqədar olaraq elektrik enerjisindən az istifadə olunması yığımların artmasına səbəb olub.
Vəsat yığımının ən böyük həcmi Ucar rayonunda 387,8 faiz, ən az isə Sabirabad rayonunda 30 faiz müşahidə olunur.
İstifadə olunmuş elektrik enerjisinin ümumi həcmindən "Azərsu" SC 19 faiz, "Azəralüminiy" ASC 69,3 faiz, Qaçqın və Məcburi Köçkünlərlə İş üzrə Dövlət Komitəsi 53,6 faiz, büdcə təşkilatları 45,3 faiz ödəyib.
SC-nin məlumatında bildirilib ki, əgər bu təşkilatlar tərəfindən ödənişlər bütövlükdə həyata keçirilsəydi, "Azərenerji"nin tədarük olunan elektrik enerjisinə görə vəsait yığımının ümumi həcmi 114 faizi təşkil edərdi.