Azərbaycan, Bakı, 22 may/ Trend / Azərbaycan Dövlət Neft Şirkəti (ARDNŞ) "Neft Daşları" dəniz yatağında hasilatın artırılması məqsədilə üç quyuda təmir işləri aparır. Bu barədə ARDNŞ-ın cümə axşamı yayılan məlumatında deyilir. Bu quyuları iyunun ortalarında istismara vermək planlaşdırılır.
Bu quyulardan planlaşdırılan sutkalıq neft hasilatı orta hesabla 25 ton təşkil edəcək.
2008-2010-cu illərdə yataqdan hasilat həcminin artırılması proqramı çərçivəsində növbəti ildə hasilat həcmini ildə 1,2 mln. tonadək çatdırmaq planlaşdırılır.
ARDNŞ geoloqlarının qiymətləndirmələrinə görə, "Neft Daşları" yatağında neftin qalıq həcmi 30 mln. ton təşkil edir. Dövlət Neft Şirkəti 2010-cu ilədək yataqdan neft hasilatını artırmaq üçün 78 yeni quyu qazacaq, həmçinin yeni platformaların tikintisi planlaşdırılır.
Son illərdə "Neft Daşları" yatağında iki platforma istismara verilib. Onlardan biri - beş blokdan ibarət №1887 platforma 36 quyuya, ikinci - №2387 platforma isə 12 quyuya hesablanıb. Bu platformalardan intensiv qazma işləri başlayıb və artıq 11 quyu istismara verilib.
