Azərbaycan, Bakı, 11 sentyabr / Trend / Azərbaycanda neft muzeyinin yaradılması ilə bağlı beş şirkətin təklif etdiyi layihələr Beynəlxalq Müsabiqə Komissiyasına təqdim olunub. Bu barədə Azərbaycan Dövlət Neft Şirkətinin (ARDNŞ) cümə axşamı yayılan məlumatında bildirilir. Təqdim olunan təkliflər yaxın vaxtlarda nəzərdən keçiriləcək və onlara dair qərar qəbul olunacaq.
Neft muzeyinin yaradılması üzrə layihələr "Region" yerli şirkətlər qrupu, Amerikanın "Bridgeborn" şirkəti və Yunanıstnın "Anamorphosis Architects" şirkəti tərəfindən təqdim olunub. Sonuncu şirkət öz layihəsini ikinci dəfə Müsabiqə Komissiyasına təqdim edib. İlk dəfə Türkiyənin "Toca" şirkəti və "Alba Dis Tic.ve Mobilya" (Türkiyə) şirkətinin Bakı filialı neft muzeyinə dair öz layihələrini təqdim edib.
Muzey Bakı şəhərinin Səbail rayonunda, "Azneft" İstehsalat Birliyinin "Bibi Heybət" Neft-Qaz Çıxarma İdarəsinin ərazisində yerləşən neftdən təmizlənmiş və rekultivasiya edilmiş 45 hektarlıq sahədə yerləşəcək.
Layihə muzey kompleksinin açıq və qapalı zonalarının tikintisini nəzərdə tutur. Açıq zonada sərgi qalereyaları, multipleks tipli kinozal, uşaq muzeyi və İnternet-klub, bir neçə kafe, suvenir mağazaları, iclas zalları, elmi-tədqiqat mərkəzi, kitabxana, ARDNŞ-in mərkəzləşdirilmiş arxivi, qonaq evi yerləşəcək. Burada yeddi park, həmçinin daha bir park və avtomobil dayanacağından ibarət olan kompleksin tikintisi planlaşdırılıb. Qapalı zonaya isə muzeyin binası aiddir.
Yeni muzeyin tikintisi zamanı yüksəkkeyfiyyətli, beynəlxalq standartlara cavab verən konstruksiya, material və avadanlıqlar, həmçinin yeni texnologiya və innovasiyalardan istifadə nəzərdə tutulub.