Azərbaycan, Bakı, 24 sentyabr/ Trend / SOCAR şirkəti (Azərbaycanın Dövlət Neft Şirkəti) noyabrda "Şimal" elektrik stansiyası və Bakı ətrafının qazla təmin olunması üçün nəzərdə tutulan yeni Bahar - Hövsan - Suraxanı qaz kəmərinin sualtı hissəsinin tikintisini başa çatdıracaq, - SOCAR-ın çərşənbə günü yayılan məlumatında bildirilir.
Boru kəmərinin düzülməsi ilə "Süleyman Vəzirov" borudüzən gəmisi həyata keçirəcək. Boru kəmərinin sahildən çatdırılması ilə "Oqtay Vəliyev" və "İrgiz" yedək gəmiləri məşğul olacaq.
20 düymlük Bahar - Hövsan - Suraxanı boru kəmərinin ümumi uzunluğu 49 kilometrdir (sualtı hissəsi 37 km, yerüstü - 12 km). Boru kəmərinin sutkalıq ötürmə gücü 5 mln. kubmetr qaza bərabərdir. Boru kəmərinin çəkiləcəyi dərinlik 12 -16 metr arasında dəyişir. Qaz kəmərinin sualtı hissəsinin sifarişçisi "28 may" Neft - Qaz Çıxarma İdarəsi, yerüstü hissənin sifarişçisi isə, Qaz Əməliyyatları İdarəsidir. Boru kəməri ilə "Günəşli" dəniz yatağından hasil edilən qaz nəql ediləcək.
Boru kəməri ARDNŞ - nin 2008 - ci il üçün qaz proqramı çərçivəsində istismara veriləcək ən iri obyektlərdən biridir.
Proqram ARDNŞ - nin şəxsi vəsaitləri hesabına işlədiyi yataqlardan hasilatı ildə 8 mlrd. kubmetrədək artırmasını nəzərdə tutur. Bu həcmin 7 mlrd. kubmetri dövlətə veriləcək.
